【生活。有感】不再係Fresh Grad嘅你,認清社會未?

一到畢業、搵工嘅季節,又係好多「搵乜工好」、「讀嘅科同出黎做嘅野完全唔一樣」、「畢業後前路好迷茫」嘅煩惱,,又或者「出到嚟做野覺得讀書真係好開心」、「好想返去以前讀書個陣」等等嘅文章,而被HR刁難、被壓價的例子也有不少。喺Fresh Grad時就話你唔夠經驗;就算畀你做多三、五、七年野,出面嘅人都係覺得你唔夠料乜乜乜乜,其實要點先可以畀呢個社會認可?

初初fresh grad嗰陣,覺得自己咩都唔識,畀人壓吓價都係一件好正常、心諗「唔緊要啦」,當由低做起。入左第一間公司,嘩,原來公司係咁嘅,好多野又唔識學到識。回顧fresh grad到而家「假假地」都有兩、三年經驗嘅,都算係獲益良多。「獲益良多」係真心架,學既唔止係工作上程序、工作安排、分配、做咩都要自己落手落腳,仲有同同事相處,面對老闆、阿姐,待客之「道」等等,我諗做野呢幾年IQ就冇乜升過啦,但Communication Skill同EQ就真係升左唔少嘅。(真心的!)但你就算幾鍾意間公司、同同事幾好相處都好,總會有想走嘅一日,第一個Case係你想轉行,所有野都要重新嚟過,再作別論啦。大部分人都透過頭幾份工去測試自己係咪想繼續朝著呢類型嘅工作發展,你諗住:「哈~都做左幾年野啦,已經少少工作經驗,應該搵工會比以前暢順啲啦掛~」諗住有幾年經驗係手,搵工都有返少少自信。哈~少年,你太年輕了!

終於唔係一張白紙,執好個CV,Send出咗幾份Job application,好好彩又有電話打嚟叫你Interview,點知Interview當日見個HR或者老闆,嚟段個人介紹之後就開始講expected salary,之後?講完一大輪,話你呢樣冇做過,嗰樣唔熟…….然後拎你同出面班同事比較,再加多句:「我唔係請唔起你,出面啲同事求其執一個都人工高過你。」一邊踐踏緊你過往幾年嘅努力,踩到一文不值咁行出個門口。(真實事件sosad)

有人會諗:「呢間公司唔適合我,面前有更好既選擇。」(我每次安慰自己時都會咁諗!)唔講出發點係咪想壓價,係咪想Test我心理質素夠唔夠高,其實畀人咁樣奚落,畀人當面數自己有幾差,個心又點會舒服。感覺就好似強姦完你,仲要你講返句多謝咁。比起以前,因為冇乜工作經驗,低聲下氣OK!但而家有少少工作經驗,待遇一樣係咁。然後你發覺無論做到幾多年工作,總會畀人刁難、畀人講到你一無是處,「省」到你一臉屁。係嘅我做得幾年野,資歷淺,知道自己咩料子,仲有大把野需要學習,但有時夜闌人靜時,都不禁問自己:「乜我真係咁差咩?畀佢講到我一文不值咩?」係工作上搵到嘅滿足感,似乎徹徹底底地被人擊碎,呢種感覺一點都不好受。

畀人踩到連尊嚴都冇埋,每次諗返起都好想上去鬧返條Pk,不過現實上嘅你只係為左一啖氣,喺背後係咁hi返人家阿媽,又或者大喊過後,還是繼續要喺呢個世界上生存。唉!呢啲野嬲一日好啦,第二天重新來過。唔知點解,做一個Fresh Grad畀人話唔夠工作經驗好似預咗,但做咗野三、四年後,個人好似變得更加玻璃心,比以前更難承受一啲比粗口更難聽嘅説話。

Fresh Grad時嫌你冇經驗、做咗兩、三年野又話你呢樣唔識嗰樣唔熟、做到Assistant Manager位又話你唔熟個Business Model、做到Manager又話你Lead唔住條team……踩到你無地自容。我開始明白,點解啲人喺一間公司做都唔想出去搵工,大概就係承受唔到嘅衝擊同安於現狀卦~不過每次出外見識(即係Interview、見客、交際應湊等等呢啲⋯)都學識咗一樣野,就係唔好太介懷,社會係踐踏別人為樂的地方,而我們想要在這社會生存的,就係學會被踐踏過後仍能無事站起來,繼續笑面迎人。

我喺度同自己講,一係安於現狀,繼續係呢間公司做野,咁樣最叻都只係做到公司最勁嗰個,但係永遠都唔知呢個世界外面更多勁人,一世做井底之蛙;一係就承受吓呢啲野,去睇吓自己嘅能力去到邊,跟呢個世界的人比較。

各位,共勉之。

Leave a Reply